ሰላም ወንድም እና እህቶች !

የዘር አምባጓሮ የኃይማኖት ንትርክ ወሎ መች ለመደ : ሥሙ ምስክር ነው ፋጤ ገብረማርያም ሙህዬ ከበደ :: ወሎ - ላኮመልዛ - የአሥራ ሁለት አውራጃዎች (ዋግ - ላስታ - ራያ ቆቦ - የጁ - አምባሰል - ዴሴ ዙሪያ - አውሳ - ቃሉ - ቦረና - ወረኢሉ - ዋድላ ደላንታ እና ወረሂመኖ ) ባለቤት ፣ የሙዚቃ ቅኝቶች (ባቲ - አንች ሆዬ አምባሰል እና ትዝታ ) ምንጭ ፣ የታሪካዊ ቦታዎች (ውጫሌ መቅደላ ላል ይበላ ጊሼን ወዘተ ) ሥፍራ ፣ የሙያ እና የቀለም ትምህርት ቤቶች (ወ /ሮ ስሂን ወልዲያ ወዘተ ) ፣ የሙዚቃ የጀግኖች ባለሙያዎች እና ምሁራን መፍለቂያ ፣ እስላም እና ክርስቲያኑ ፣ ብሔር ብሔረሰቦች በአንድነት እና በእኩልነት የሚኖሩበት አገር ነው :: በጥቅሉ ወሎ ገራገሩ ማለት ይቀላል::

አማርኛው የእኔ ትግርኛውም የእኔ :

አፋርኛውም የእኔ ኦሮምኛውም የእኔ :

አገውኛውም የእኔ አርጎብኛውም የእኔ :

ጋፋትኛውም የእኔ ቆንጆዎችም የእኔ :

ክርስትናው የእኔ እስልምናው የእኔ :

ያም እኔ ያም እኔ ያገር ልጅ ወገኔ :

በጣም ያኮራኛል ንፁህ ኢትዮጵያዊ ወሎዬ መሆኔ ::

የወሎን ህዝብ በትምህርት በግብርና በጤና በባህል ታሪካዊ ቦታዎችን በመንከባከብ እና በመሳሰሉት አብይ አንኳር መስኮች ማሳደግ እና ማዳበር የሁላችንም ጥረት ይሆናል :: ሁላችንም በመተባበር ለዚህ ቀና ዓላማ ግብ መድረስ የበኩላችንን አስተዋፅኦ ማበርከት እንችላለን :: ሥለዚህ በዚህ ዐምድ እና መድረክ ቅን ሃሳቦችን መሠንዘር እንችላለን :: በተጨማሪ ፓልቶክ ውስጥ WOLLO ETHIOPIA SOCIAL & CULTURE VALUES በሚለው ክፍል ውስጥ ቅዳሜ እና እሁድ ከ 21:00 CET ጀምሮ መወያዬት ለብቁ ውሳኔ እና ተግባር ጥርጊያ መንገድ መክፈት ይቻላል :: ፓልቶኩ እንደ አመችነቱ በየቀኑ ይከፈታል ::

ብሩህ ለሆነ ዓላማ አብረን እንነሳ

ስኂን ትጣራለች !!

የሰው አስኳል የሰው እንብርት :

የእውቀት ጮራ ፋና ወጊት ::

ስንት አርግዘሽ ስንት ወለድሽ :

ስንት ዘርተሽ ስንት አበቀልሽ :

ስንት አትርፈሽ ስንት ገደልሽ :

ስንት አጥፍተሽ ስንት ታደግሽ

ስኂን ስኅኗ መቅረዛዊት :

ያንቺ ውላጅ ያንቺ ቁራጭ :

ያንቺ ፍላጭ ያንቺ ቅዳጅ ::

በምድረ አለሙ ተናኝቶ :

ድንቅ ውሎ ዋለ ጎምርቶ :

ይበል ይበል ተሰኝቶ ::

አዎ ስኂን ስኂኗ መቅረዛዊት :

የእውቀት ጮራ ፋና ወጊት ::

ዝንተ ዓለም ህያው ነው ግብረ ተመክሮሽ :

እንኳን ቅርስ ነው ምግባረ ውሎሽ ::

አንችስ ህያው ነሽ : ማነው ሞትሽ ያለሽ ?

ስኂን ስኂኗ መቅረዛዊት

የእውቀት ጮራ ፋና ወጊት ::

1985

ሕብረት ኃይል ነው ::

እህታችሁ ወረኢሉ ከወሎ ገራገሩ